တိုင်းရင်းသားရိုးရာပွဲ​တော်စာ- ၁

​ဆောင်းရာသီကို ကျမက နှစ်သက်ပါသည်။ ဘာ​ကြောင့်လည်းဆိုရင် ​ဆောင်းရာသီမှာ ရာသီ​ပေါ်သီးနှံ​လေး​တွေ စုံလင်လှ​သော​ကြောင့်ဖြစ်သည်။ ​​ဒေသထွက် ခရမ်းချဥ်သီး မုန်လာထုတ် မုန်လာပွင့် ​​မြေ​တောင့်ပဲ ပဲ​တောင့်ရှည် မုန်ညှင်း စသည့်သီးနှံများမှာ ​ပေါများလှကာ ​စျေးလည်းချိုလှပါသည်။ ကျမက မုန်ညှင်းကြိုက်သူဖြစ်သည်။ မုန်ညှင်းချဥ် မုန်ညှင်းဟင်းရည် မုန်ညှင်း​​ဆော ဘယ်လိုပင်ချက်ချက် မုန်ညှင်းကို ကြိုက်ပါသည်။ ဗန်း​မော်​ဒေသမှ ထွက်​သော ​တောင်​ပေါ် မုန်ညှင်းမှာ စားဖူးသမျှ မုန်ညှင်းထဲတွင် အ​ကောင်းဆုံးဟု ဆိုနိုင်ပါသည်။

Image Source

ဗန်း​မော်​ဒေသ စိန်လုံ​တောင်တန်း​ပေါ်တွင် စိုက်ပျိုးကာ မုန်ညှင်းတစ်ပင်လျှင် ၄​ပေ ၅​ပေခန့် ရှည်ပါသည်။တစ်ပင်ဆိုလျှင် ၅ရက်ခန့် စားနိုင်​လေသည်။ မုန်ညှင်းရွက်ကြီးများမှာ ကြီးမားပြန့်ကားကာ တစ်ရွက်ဆိုလျှင် ဟင်းတစ်အိုးစာ စား၍​လောက်​ပေသည်။ ဗန်း​မော်​ဒေသတွင် မုန်ညှင်းကို ဟင်းရည်ချက်စားရာတွင် ​ဒေသအ​ခေါ် မုန်ညှင်း​ဆောသည်ဟု ​ခေါ်ကျသည်။ မုန်ညှင်း​ဆောရာတွင် ရှမ်း​ဆော ဗမာ​ဆော စသည်ဖြင့် ရှိ​သေးသည်။ ကျမက​တော့ ရှမ်းဗမာလူမျိုး ဖြစ်သည်နှင့် အညီ ရှမ်း​ဆောနှင့် ဗမာ​ဆောကို ​ပေါင်းစပ်ကာ ရှမ်းဗမာ​ဆော ​ဆောစားပါသည်။

Source Image

ချက်နည်းမှာ မုန်ညှင်းပင်ကို အရွက်​​​ကော အရိုးအရင့်များ​ကော ဓါးဖြင့်တူညီစွာ ပိုင်းဖြတ်ပါသည်။ အရင့်အနု အကုန် ထည့်ချက်ရပါသည်။ ဖြတ်ပြီး​သော မုန်ညှင်းများကို ​ရေစင်စင်​ဆေးရပါသည်။ ထို့​နောက် မုန်ညှင်း​ဆောမည့် အိုးထဲသို့ထည့်ပြီး ကြက်သွန်ဖြူ​ထောင်း ဆနွမ်းအနည်း ထန်းလျှက်အမဲ သင့်ရုံ မန်ကျဥ်းမှည့် ဆား ဟင်းခတ်မှုန့်တို့ထည့်ကာ အဖုံးအုပ်ထားပါသည်။ မုန်ညှင်းများနွမ်းလာပါက ​ရေအနည်းငယ်ထည့်ကာ တည်ထားပါသည်။ ​ရေနည်းလျှင် ထပ်ထည့်ပါသည်။ ​ရေအများကြီးကို တစ်ခါတည်းထည့်လျှင် မုန်ညှင်းနူးရန် အချိန်ကြာတက်ပါသည်။ မနက်စားမည်ဆိုပါက ညကတည်းက ချက်ပါ်သည်။ မုန်ညှင်းရိုးများပါ နူးအိလာသည်အထိ ချက်ပါသည်။ မုန်ညှင်းရိုးအတွင်းမှ အနှစ်သည် မုန်ညှင်း​ဆော၏အဓိက အရသာဖြစ်ပါသည်။ မုန်ညှင်း​ဆောနှင့်တွဲဖတ်၍ ငါးအုံး ငါး​ပေါင်း ငရုတ်သီး​ထောင်းများနှင့် စားသုံးပါက ထမင်းမိန်​စေပါသည်။ ​စားခါနီးတွင် ဟင်းရည်​ပေါ်၌ ကြက်သွန်ဖြူ​ထောင်းနှင့် နံနံပင်ကို အုပ်​ပေးပါက အနံ့အရသာပြည့်စုံသည့် ဟင်းလျာ​ကောင်းတစ်ခွက်ဖြစ်လာပါသည်။ နောက်အပိုင်းများတွင် ငါးအုံးနည်းကို ဆက်လက်​ဖော်ပြသွားပါမည်။ ရွှင်လန်းချမ်း​မြေ့ကျပါ​စေ။
@suhlaing
21-1-2022
​သောကြာ​နေ့
နံနက် ၁၀း၄၃